ចាប់តាំងពីពេលបើកការប្រកួតបាល់ទាត់មិត្តភាព E-GetS/អ៊ី-ហ្គេត លើកទី 4 កាលពីថ្ងៃទី 20 ខែកញ្ញា ឆ្នាំ 2023 មក ការប្រកួតសរុបចំនួន 24 លើក ដែលរួមបញ្ចូលការប្រកួតសន្សំពិន្ទុចំនួន 21 លើក ការប្រកួតវគ្គកណ្តាលផ្តាច់ព្រ័ត្រចំនួន 2 លើក និងការប្រកួតដណ្តើមយកមេដាយសំរិទ្ធចំនួន 1 លើក។ បន្ទាប់ពីការប្រកួតដ៏ស្វិតស្វាញអស់រយៈពេល 3 ខែ 20 ថ្ងៃ ទីបំផុតក្រុមចំនួនពីរគឺ ក្រុមកីឡាករសាខាបឹងកេងកង (ភ្នំពេញ) និង ក្រុមកីឡាករសាខា CT (ក្រុងព្រះសីហនុ) បានឈានទៅដល់វគ្គផ្តាច់ព្រ័ត្រ។ ក្នុងការប្រកួតពេញមួយវគ្គនេះគឺពោរពេញដោយភាពខ្លាំងក្លា ដែលក្រុមនីមួយៗបានប្រកួតគ្នាតាមស្ទីល និងកម្រិតសមត្ថភាពរៀងៗខ្លួន ដោយបង្ហាញពីឆន្ទៈនិងភាពក្លាហានក្នុងការប្រកួតរបស់ពួកគាត់។
នៅថ្ងៃការប្រកួតក៏មានវត្តមានដ៏ខ្ពង់ខ្ពស់របស់លោក Xiao Lianhuo អគ្គនាយកក្រុមហ៊ុន E-GetS/អ៊ី-ហ្គេត កញ្ញា Wang Huifang ជំនួយការអគ្គនាយក លោក Hu Gui នាយកផ្នែកដឹកជញ្ជូន លោកស្រី Liu Xiaofeng នាយករងផ្នែកសេវាកម្មអតិថិជន លោក Li Tiecheng នាយករងផ្នែកគណនេយ្យ និងហិរញ្ញវត្ថុ លោក Zheng Jiale នាយកប្រតិបត្តិការ Dola Mall និងលោក Xiao Caiyun នាយករងប្រតិបត្តិការ Dola Mall ព្រមទាំងបុគ្គលិកក្រុមហ៊ុន និងក្រុមគ្រួសាររបស់អ្នកដឹកជញូន ទស្សនិកជនជាង 800 នាក់ បានចូលរួមក្នុងការប្រកួតនេះ។
បន្ទាប់ពីការប្រកួតបានចាប់ផ្តើម ក្រុមកីឡាករទាំងសងខាងគឺពោរពេញដោយថាមពល និងស្មារតីប្រយុទ្ធ ដែលឆ្លុះបង្ហាញពីស្មារតីសហការជាក្រុម និងសមត្ថភាពការលេងកីឡារបស់អ្នកដឹកជញ្ជូន E-GetS/អ៊ី-ហ្គេត ជាមួយសកម្មភាពជាក់ស្តែង។ ក្រុមកីឡាករបានរត់បញ្ជូនបាល់ ស៊ុតបាល់នៅលើវាលស្មៅដែលរាល់សកម្មភាពទាំងនោះពោរពេញដោយកម្លាំង និងភាពសប្បាយ។ បរិយាកាសកន្លែងប្រកួតកាន់តែតានតឹង ពិន្ទុគួរឲ្យព្រីព្រួច អ្នកទាត់មកខ្ញុំទាត់ទៅដោយបិទផ្លូវគ្នាទៅវិញទៅមក រួមជាមួយសំឡេងស្រែកហ៊ោកញ្ជ្រៀវពីអ្នកគាំទ្រ ធ្វើឲ្យកីឡាដ្ឋានទាំងមូលកាន់តែមានភាពអធិកអធម។
បន្ទាប់ពីឆ្លងកាត់ការប្រកួតដ៏ក្តៅកគុកអស់រយៈពេល 90 នាទីរួចមក ទីបំផុតក្រុមកីឡាករសាខាបឹងកេងកង (ភ្នំពេញ) បានយកឈ្នះក្រុមកីឡាករសាខា CT (ក្រុងព្រះសីហន) ដោយ 4 ទល់នឹង 1 ទទួលបានពានរង្វាន់ជើងឯកនៃការប្រកួតបាល់ទាត់មិត្តភាពឆ្នាំនេះ នាំមកនូវការបញ្ចប់ដ៏ជោគជ័យ។ ជ័យជម្នះលើកនេះមិនត្រឹមតែជាកិត្តិយសសម្រាប់ក្រុមកីឡាករសាខាបឹងកេងកង (ភ្នំពេញ) ប៉ុណ្ណោះទេ ថែមទាំងជាការតបស្នងដ៏ល្អបំផុតសម្រាប់ការហ្វឹកហាត់ដ៏លំបាក និងការខិតខំឥតឈប់ឈររបស់ពួកគេ។
បន្ទាប់ពីការប្រកួតបានបញ្ចប់ វគ្គប្រគល់ពានរង្វាន់បានឈានមកដល់ ដំបូងគឺចែកជូនពានង្វាន់បុគ្គល ដែលរួមមានពានរង្វាន់ស្រោមដៃមាស ពានរង្វាន់កីឡាករស៊ុតបញ្ចូលទីច្រើនជាងគេ ពានរង្វាន់កីឡាករឆ្នើមសម្រាប់វគ្គផ្តាច់ព្រ័ត្រ និងពានរង្វាន់យុវជនក្លាហាន។ បន្ទាប់មកគឺជាការប្រគល់ពានរង្វាន់ដល់ក្រុមជើងឯក និងជើងឯករងក្នុងការប្រកួតនេះ។ ជាមួយគ្នានេះដែរ ក៏មានការទទួលស្គាល់ និងលើកទឹកចិត្តដល់ក្រុមកីឡាករផ្សេងទៀតដែលបានចូលរួមផងដែរ។ មិនថាឈ្នះ ឬចាញ់ អ្នកដឹកជញ្ជូនគ្រប់រូបបានបញ្ចេញនូវភាពរីករាយ និងការខិតខំប្រឹងប្រែងរបស់ពួកគាត់ ដើម្បីបង្ហាញយើងទាំងអស់គ្នាពីភាពទាក់ទាញ និងឥទិ្ធពលនៃកីឡាបាល់ទាត់។
បន្ទាប់ពីពិធីប្រគល់រង្វាន់បានបញ្ចប់ លោក Xiao Lianhuo អគ្គនាយកក្រុមហ៊ុន E-GetS/អ៊ី-ហ្គេត បានឡើងថ្លែងសុន្ទរកថាដើម្បីបិទការប្រកួត។ គាត់បានលើកឡើងថា ការប្រកួតកីឡាបាល់ទាត់លើកនេះមិនត្រឹមតែជំរុញឱ្យបុគ្គលិកមានការស្រលាញ់ចំពោះវិស័យកីឡាប៉ុណ្ណោះទេ ថែមទាំងជួយពង្រឹងសាមគ្គីភាព និងកិច្ចសហប្រតិបត្តិការក្នុងក្រុមផងដែរ។ ស្របជាមួយគ្នានេះ ក៏បានបង្ហាញអ្នកទាំងអស់គ្នាពីផ្នែកមួយទៀតនៃអ្នកដឹកជញ្ជូន។ ពួកគាត់មិនត្រឹមតែជាអ្នកដឹកជញ្ជូនអាហារប៉ុណ្ណោះទេ ថែមទាំងជាយុវជនដែលស្រលាញ់ជីវិត និងកីឡាផងដែរ។ ពួកគាត់បង្កើតមិត្តភាពក្នុងការប្រកួតបាល់ទាត់ និងបញ្ជូនមិត្តភាពតាមរយៈកីឡា ដោយបង្ហាញពីស្មារតីមិត្តភាពរបស់ក្រុមអ្នកដឹកជញ្ជូន E-GetS/អ៊ី-ហ្គេត។
នាថ្ងៃអនាគត E-GetS/អ៊ី-ហ្គេត ក៏នឹងបន្តផ្តោតលើការរីកចម្រើន និងការអភិវឌ្ឍន៍របស់អ្នកដឹកជញ្ជូន ដើម្បីបង្កើតនូវបរិយាកាសការងារប្រកបដោយសុខដុមរមនា និងមានសុខភាពល្អសម្រាប់អ្នកដឹកជញ្ជូន។ ព្រមទាំងនាំមកនូវជីវិតសាមញ្ញដែលប្រកបដោយស្មារតីចម្រុះសម្បូរបែបក្នុងជីវិតរស់នៅរបស់ពួកគាត់ផងដែរ។ ក្រុមអ្នកដឹកជញ្ជូន E-GetS/អ៊ី-ហ្គេត នឹងបន្តរក្សានូវភាពរីករាយ និងភាពរឹងមាំ ដើម្បីនាំមកនូវភាពងាយស្រួល និងសុភមង្គលដល់ជីវិតរស់នៅរបស់អតិថិជនម្នាក់ៗ និងរួមចំណែកកាន់តែច្រើនក្នុងការអភិវឌ្ឍន៍ទីក្រុង !
